🌿 Do invernadoiro ao mercado: a aventura verde de 3ºA!
Antes de nada, queremos comezar dando as grazas ao Concello de Ames 🙌 pola súa colaboración ao facerse cargo do cambio do plástico do invernadoiro, algo que xa lle facía boa falta. Grazas a este arranxo, agora temos un espazo perfecto para seguir aprendendo, experimentar e… mancharnos un pouco as mans de terra! 🌱
A cativada de 3º A de Educación Primaria xa ten algunhas ideas moi claras sobre economía circular ♻️. Mentres realizaban os traballos de limpeza das herbas que naceran da colleita do curso pasado, sacharon, rastrillaron e puxéronse a falar das posibilidades do noso pequeno horto. Entre comentario e comentario, alguén soltou:
👉 “E se plantamos cousas para logo levalas vender ao mercado?”
E claro… a idea quedou voando no aire! 😄
Durante esta experiencia de traballo cooperativo 🤝, non faltaron as risas, as bromas e algún que outro berro inesperado. Por que? Pois porque de cando en vez aparecía algunha araña 🕷️, un grillo 🦗 ou unha miñoca 🪱 que facía saltar a máis dun!
Este tipo de actividades son xeniais para que a rapazada vaia asumindo responsabilidades de cara ao futuro: haberá que arrincar as malas herbas, regar, coidar as plantas e estar atentos ao seu crecemento. Todo forma parte da aventura de cultivar! 🌿💧
Nesta ocasión decidiron plantar un montón de cousas riquísimas e cheas de cor:
🥬 leitugas de diferentes cores
🍅 tomates
🌱 tirabeques
🥦 coliflor
🥬 repolo
🧅 cebolo morado
🍃 acelgas vermellas
Agora toca coidar o que sementaron e esperar a que a terra faga a súa maxia.
👉 Bótalle un ollo ao vídeo 🎥 e verás o ben que o pasaron mentres sementaban! Entre terra, risas e algún susto pequeno… a aprendizaxe tamén medra no noso invernadoiro! 🌱😄
