ENTRE FABAS E LEITUGAS, NO AGRO SEMENTAMOS CONCIENCIA: 3º DE PRIMARIA

 

🌱 Educando no respecto á natureza: o noso invernadoiro escolar 🌍

No Agro, temos moi claro que a educación en valores como a responsabilidade e o respecto polo medio ambiente é fundamental dende idades temperás. A natureza forma parte das nosas vidas, e coidala é un deber de todos e todas. Por iso, promovemos actividades que axudan a tomar consciencia e a implicarse activamente no coidado da nosa contorna.

Un claro exemplo disto é o noso invernadoiro escolar, un espazo que serve de aula viva onde o alumnado pode aprender en contacto directo coa terra. Esta vez, foron os nenos e nenas de 3ºB e 3ºC de Primaria os que tiveron a oportunidade de sementar e coidar as súas propias plantas.

🐞Comezaron facendo os semilleiros de chícharos, fabas, leitugas e perexil, observando con ilusión como, pouco a pouco, as sementes ían agromando. Antes de plantar, tamén prepararon o terreo: arrincaron as herbas, sacharon e traballaron man a man, coma nos vellos tempos.

Pero o máis importante vén despois: as responsabilidades do día a día. Toca organizar quendas para a rega, aprender a recoñecer as malas herbas, estar atentos ao crecemento das plantas e mesmo detectar posibles pragas. Unha verdadeira labor de equipo que lles permite desenvolver habilidades e valores moi importantes para o seu futuro.

Porque educar é tamén ensinar a coidar, a observar, a ser pacientes e a traballar xuntos polo ben común.

💚 Se queres ver como traballan no invernadoiro e todo o que están a facer nos seus arredores, clica no vídeo e acompáñaos nesta aventura verde!

COIDAMOS AS NOSAS PRAIAS, 5º PRIMARIA

 

Limpeza da Praia de Broña: Pequenos Xestos para un Gran Cambio

A contaminación mariña é un dos grandes desafíos ambientais do noso tempo, e as nosas costas non son unha excepción. A praia de Broña, na ría de Noia, é un espazo natural de gran beleza, pero tamén sofre as consecuencias da acumulación de lixo, especialmente plásticos, que ameazan a vida mariña e o equilibrio do ecosistema.

Co obxectivo de concienciar ao noso alumnado sobre a importancia de coidar o medio ambiente, organizamos unha xornada de limpeza da praia en colaboración co CEIGA. A través desta actividade, os nenos e nenas aprenden de primeira man o impacto dos residuos no mar e descobren como pequenos xestos, como reducir o uso do plástico e reciclar correctamente, poden marcar a diferenza.

Compartimos a nosa experiencia, reflexións do alumnado e imaxes desta iniciativa, coa esperanza de inspirar a máis persoas a sumarse á loita contra a contaminación mariña. Porque coidar o planeta é responsabilidade de todos.

Preme no vídeo: 

💙🌊 Xuntos, facemos a diferenza!

INNOVA AMES: 5º INFANTIL

O noso alumnado de 5º de Infantil embarcouse nunha emocionante aventura a través do proxecto "O Mundo Submarino", co que participaron no concurso INNOVAMES de proxectos educativos. O seu esforzo e creatividade foron recoñecidos cun fantástico 3º premio, un logro que nos enche de orgullo! 🏆✨

Este proxecto naceu coa misión de transmitir aos máis pequenos a importancia de coidar os océanos, os mares e os recursos mariños, fomentando ao mesmo tempo unha actitude sostible fronte á contaminación. A través de experiencias prácticas e creativas, os nenos e nenas aprenderon a protexer o medio ambiente dun xeito innovador e divertido.

Durante esta xornada especial, o alumnado tivo a oportunidade de explorar diversas propostas tecnolóxicas relacionadas co coidado do planeta. Ademais, levaron a cabo unha actividade moi especial: a plantación de sementes (papoulas, liño, sésamo...) nun sustrato único feito de terra e fariña. A ilusión con que sementaron estas pequenas vidas reflectiu o seu compromiso co medio natural.

👉 Preme no vídeo para descubrir como desfrutaron desta marabillosa experiencia! 🌱💙