A COLLEITAR CON ALEGRÍA, 3º PRIMARIA

Leitugas con moito mimo! 🥬

O alumnado de 3º de Primaria estivo traballando arreo no noso invernadoiro… ¡e por fin chegou o gran momento! a primeira colleita de leitugas! 🥳🥬

👉 Temos a primeira colleita de leitugas!

Estas leitugas non medraron soas, eh! Aquí houbo moito traballo detrás:
🧤 sachamos,
🌱 plantamos,
🚿 regamos,
🌿 arrincamos malas herbas
e sobre todo... coidámolas con moito agarimo día tras día. 💚

Agora temos nas mans unhas leitugas preciosas, de brillantes follas verdes, que van directiñas para as casas das nosas pequenas e pequenos horteláns.

Pero atención... ¡isto non remata aquí!
👉 Xa temos o terreo preparado e plantamos máis leitugas, coa esperanza de recoller unha segunda colleita antes de que remate o curso.

💪 E mentres tanto, seguimos coidando outras marabillas da nosa horta: espinacas, chícharos, acelgas e perexil.

Pero isto non remata aquí! Mentres uns recollían, outros xa estaban preparando a terra para plantar máis leitugas. E mentras medran, seguen mimando tamén ás espinacas, chícharos, acelgas e perexil 🌿.

➡️ Non perdas o vídeo que preparamos, onde verás como foi a aventura de recoller a colleita e preparar a nova. Vai moito ritmo, terra e diversión! 🎥👇

MERGULLÁMONOS NA RECICLAXE COA CATIVADA DE 6ºA DE INFANTIL

 

🌊 Un océano de creatividade... feito con refugallo!

Na aula de 6ºA de Infantil decidimos poñer rumbo ao fondo do mar sen saír da escola. ¿O obxectivo? Crear un ecosistema mariño con moito arte, moita cor… e sobre todo, moito compromiso co medio ambiente!

Todo comezou cunha caixa de zapatos, que se converteu no noso océano en miniatura. Para darlle forma, empregamos materiais de refugallo que tiñamos pola aula ou que cada quen trouxo da casa. Porque cando se trata de reciclar, aquí todo vale… e todo serve!

👉 Para o fondo mariño usamos unha caixa de cartón e papel de xornal cuberto con area, creando así unha base perfecta para a vida mariña.
👉 Os peixes saíron de cápsulas de café aplastadas e recortadas, ás que lle puxemos ollos, aletas e moita cor.
👉 Co papel de aluminio dos bocatas, creamos un banco de sardiñas que brilla coma se fose de verdade.
👉 E ata con paus das árbores de kiwi montamos unha batea que flota no noso océano como as reais!

Cada cativa e cativo puxo toda a súa creatividade, coidado e ilusión neste proxecto. Ademais de aprender sobre os ecosistemas mariños, reflexionamos sobre a importancia de reutilizar e reducir o lixo que xeramos cada día. Porque o planeta tamén se coida con pequenos xestos… e con grandes ideas!

O resultado? Un colorido fondo mariño cheo de vida, feito con materiais que ían para o lixo e que agora son parte dunha obra de arte colectiva. Un proxecto que mestura educación ambiental, reciclaxe e moita imaxinación.

🎥 Desfrutade do vídeo onde podedes ver todo o proceso e, por suposto, o resultado final. Avisamos: hai peixes brillantes, bateas flotantes e moito máis!

SEMENTANDO ILUSIÓN: TAGETES E VALORES, 6º INFANTIL

🌱 De chocolate a flor: unha segunda vida chea de cor

 No Agro témolo claro: a natureza forma parte das nosas vidas e coidala é responsabilidade de todos e todas. E se sementamos valores como o respecto e a responsabilidade dende ben pequenos... ¡mellor que mellor

💚Nestes días, o alumnado de 6º de Infantil embarcouse nunha nova aventura verde: crear os seus propios semilleiros de tagetes! Pero non foi unha tarefa calquera. Para comezar, reutilizaron os vasos do chocolate quente que tomaron no Nadal, dándolles unha segunda vida e demostrando que tamén se pode aprender a coidar o medio ambiente a través de pequenos xestos.

🌱Con mans na terra e moita ilusión, prepararon os semilleiros, sementaron as sementes e agora observan como, aos poucos, as primeiras plantiñas van agromando. É marabilloso ver como o coidado, a paciencia e o respecto pola natureza dan froitos... ou flores, neste caso! 🌼

🎬 Neste vídeo podedes ver ao noso alumnado de 6º en plena acción! Con entusiasmo e creatividade, reutilizaron materiais, aprenderon a preparar a terra e sementaron con moito mimo. Un xeito divertido e responsable de dar unha segunda vida aos obxectos, ao tempo que desenvolven actitudes sostibles e valores que medran con eles.

Non perdades detalle do proceso: desde o preparado dos vasos ata o momento de sementar... e máis alá! 🌱💚

ACABOUSE O DÍA... ACABOUSE A ROMERÍA!

 🌸 Acabouse o día... acabouse a romería! 🌿

Durante a xornada do 2 de maio, a cativada de Infantil encheu o colexio de cor construíndo fermosas estruturas con elementos vexetais. Usaron follas, flores e ramas de todo tipo: 🌿 Fiuncho, xestas, pampullos, estalotes, cartuchos, rosas, fieitos, hedras...

🧹 Pero... todo o que comeza, ten un final

Como di o refrán: "Acabouse o día, acabouse a romería". E tocou recoller. A tarefa non foi a favorita da cativada... as flores estaban xa murchas e algunha cara de noxo apareceu ao atopar pequenos bichiños entre as follas 🐛😅. Pero aínda así, todos e todas colaboraron e fixeron unha recollida como auténticos expertos en limpeza natural.

♻️ Todo ao composteiro!

O mellor de todo é que todo o material orgánico foi parar ao composteiro da zona de Infantil. Así, ademais de recoller, tamén aprendemos sobre reducir residuos e darlles unha segunda vida ás plantas, transformándoas en compost para alimentar a terra.

🎥  No seguinte vídeo poderedes ver á nosa cativada en acción. Non volo perdades! Desfrutade do vídeo que deixamos a continuación, onde se pode ver o gran traballo feito pola cativada, con algunha que outra expresión divertida polo camiño 😄

GARDAS DO MAR: PEQUENOS XESTOS PARA UN GRAN CAMBIO

Pequenos xestos que fan grande o planeta 🌍

Cantas veces escoitamos iso de que temos que coidar o medio ambiente? Pois nesta ocasión a rapazada de 5º e 6º de Primaria decidiron pasar das palabras aos feitos e puxéronse mans á obra! Porque se queremos un planeta máis limpo e san, temos que comprometernos de verdade e actuar con responsabilidade.

Organizamos unhas xornadas de limpeza de praias coa axuda do CEIGA (Centro de Extensión Universitaria e Divulgación Ambiental de Galicia), e foi unha experiencia xenial. O noso alumnado transformouse en auténticos gardas do mar, preparados para defender os océanos do lixo.

Durante estas dúas xornadas a rapazada realizou as seguintes tarefas:

🔹 Recoller lixo das praias
🔹 Identificar os residuos máis contaminantes
🔹 Rexistrar o tipo e cantidade de lixo atopado
🔹 Reflexionar sobre de onde vén ese lixo e que consecuencias ten

O alumnado de 5º de Primaria traballou na praia de Broña, e os de 6º de Primaria fixérono en Barraña. En ambas praias recollemos moitos residuos e clasificámolos por tipos (plásticos, latas, vidro, etc.). Con eses datos, agora podemos analizar mellor o problema e pensar entre todos solucións para evitalo.

Esta experiencia foi moi enriquecedora. Non só fixemos algo positivo polo medio ambiente, senón que aprendemos que cada acción conta. Agora sabemos que:

🌊 Todo o que tiramos, dalgún xeito, volve a nós.
🚯 A contaminación non é cousa doutros, é responsabilidade de todos.
♻️ Podemos cambiar as cousas, se actuamos con compromiso.

🔍 A continuación podedes ver as imaxes cos resumos dos rexistros que fixeron os nosos equipos de gardas do mar de 5º de Primaria. 

---

🔍 A continuación podedes ver as imaxes cos resumos dos rexistros que fixeron os nosos equipos de gardas do mar de 6º de Primaria.

🔚 Conclusión

As imaxes e os datos recollidos son un reflexo do gran traballo realizado polo noso alumnado, que demostrou compromiso, responsabilidade e ganas de mellorar o mundo no que vivimos.

Pero tamén son unha chamada de atención: o problema da contaminación segue presente e aínda queda moito por facer. Porén, cada pequeno paso conta, e con accións como esta imos polo bo camiño.

Cando educamos para coidar, educamos para transformar. Seguimos! 💚🌍

LIMPEZA DA PRAIA DE RIANXO, 5º INFANTIL

 

Limpeza na Praia de Rianxo: Pequenos Xestos, Grandes Cambios 🌍

A rapazada de 5º de Infantil do CEIP Agro do Muíño, puxeron as mans na area para coidar un espazo natural tan fermoso como a praia de Rianxo. 🐚

En colaboración coa Concellería de Medio Ambiente do Concello de Ames, e coa valiosa axuda de Xuxo e Sergio, dous grandes aliados na tarefa de concienciación ambiental, organizamos unha xornada de limpeza na praia nun día radiante de sol ☀️.

Os nenos e nenas demostraron que, aínda sendo pequenos, poden facer grandes cousas: recolleron quilos de lixo, entre eles plásticos,puntas de batea, redes, cordas, suelas de zapatillas, e todo tipo de residuos que nunca deberían rematar no mar 🌊. 

A xornada tamén incluíu unha visita moi especial: achegáronse á escultura Homenaxe Ás Xentes do Mar, deseñada por Isaac Díaz Pardo, situada en Rianxo. Alí, coñeceron un pouco máis sobre a tradición mariñeira da vila e sobre a importancia do traballo das persoas que viven e coidan do mar, xeración tras xeración. Un momento perfecto para conectar cultura, historia e respecto pola natureza.

✨ Cada pequeno xesto conta para evitar que os residuos acaben no mar.
🌊 Xuntos, demostramos que un mar sen lixo é posible!

🎬 Preme no vídeo Limpeza dunha praia e descubre como a cativada de 5º de Infantil fixo da Praia de Rianxo un lugar máis limpo, fermoso e sostible:

PLANTAMOS UN MAGNOLIO EN INFANTIL

 

Sementando Futuro: Plantamos un Magnolio en Infantil

No noso compromiso co coidado do medio ambiente e a educación en valores, o alumnado de Educación Infantil protagonizou unha xornada moi especial:

  "A plantación dun magnolio no areeiro do seu patio".

Con mans pequenas pero cheas de ilusión, fixeron algo moi grande: plantaron vida. Escolleron un magnolio, unha árbore fermosa, de folla perenne e fermosa flor branca, que co tempo dará sombra, frescura e beleza ao espazo onde xogan cada día. 

Hoxe plantan unha pequena árbore, mañá xogarán baixo o abrigo da súa sombra. Un símbolo perfecto do que sementamos na infancia: coidado, respecto e esperanza.

🌞 Porque a sombra que hoxe soñamos será mañá refuxio de xogos e ledicias.

Este pequeno xesto forma parte do noso traballo constante para concienciar sobre a importancia de protexer a natureza e os espazos que compartimos. Plantar unha árbore é tamén unha forma de deixar pegada no mundo, de facer comunidade e de mirar cara ao futuro con responsabilidade.

🌿 Porque a natureza tamén se coida dende pequenos.

No vídeo que vos deixamos a continuación, podedes ver como desfrutaron desta experiencia e como, con ilusión e entusiasmo, a rapazada de Infantil participou en cada paso do proceso.

Desfrutade do visionado e medremos todos xuntos co noso magnolio.

CELEBRAMOS A FESTA DOS MAIOS EN INFANTIL

 

O Mes das Flores: Celebramos OS MAIOS en Infantil

Como ben di o saber popular, maio é o mes das flores, e tamén da tradición. Un ano máis, e como xa é costume no noso centro, o alumnado de Educación Infantil celebrou a festa dos Maios, unha das expresións máis fermosas da nosa cultura galega.

Nesta ocasión tan especial, os nenos e nenas trouxeron da casa unha chea de plantas e flores típicas da nosa contorna: fiuncho, xestas, pampullos, estalotes, cartuchos, rosas, fieitos, hedras... Con moita ilusión, traballo en equipo e creatividade, elaboraron diferentes figuras florais para dar vida aos seus propios Maios, convertendo o patio nun auténtico xardín cheo de cor, arrecendo e alegría.

Esta actividade, ademais de festiva, é unha oportunidade perfecta para coñecer e valorar a nosa tradición popular, o respecto pola natureza e o traballo colaborativo, tres valores que coidamos con moito agarimo.

Se queres ver como desfrutaron deste día tan especial, clica na imaxe e déixate levar pola ledicia e a cor da primavera que os máis pequenos souberon celebrar como merecen.

🌸🌿 Viva o mes de maio! Viva os Maios! 🌿🌸

CONTAMOS A EXPERIENCIA DESENVOLVIDA NA PRAIA DE BARRAÑA, 6º PRIMARIA

 

Limpeza da Praia de Barraña en Boiro: Pequenos Xestos para un Gran Cambio

A contaminación mariña é un dos grandes desafíos ambientais do noso tempo, e as nosas costas galegas non son unha excepción. A praia de Barraña, en Boiro, é un espazo natural que tamén sofre as consecuencias da acumulación de lixo, especialmente plásticos, que ameazan a biodiversidade mariña e o equilibrio do ecosistema costeiro.

Co obxectivo de concienciar ao noso alumnado sobre a importancia de coidar o medio ambiente, organizamos unha xornada de limpeza da praia en colaboración co CEIGA (Centro de Extensión Universitaria e Divulgación Ambiental de Galicia). Durante esta actividade, os nenos e nenas convertéronse en verdadeiros “guardas do mar”, recollendo residuos, identificando os materiais máis contaminantes e reflexionando sobre as súas orixes e consecuencias.

A experiencia foi especialmente enriquecedora, xa que non só participaron activamente na limpeza, senón que tamén realizaron rexistros detallados do tipo e cantidade de lixo recollido.  Estes datos axudan a analizar o impacto real da contaminación e a comprender mellor como actuar para previr o problema.

Ademais, no vídeo que compartimos a continuación pódense ver entrevistas realizadas á rapazada participante, onde expresan as súas impresións, aprendizaxes e compromiso co coidado do medio ambiente. Unha mostra auténtica da importancia de educar na acción.

Queremos compartir convosco algunhas imaxes desta xornada e as reflexións do alumnado, que demostran que a educación ambiental é clave para formar cidadáns responsables e comprometidos co planeta.

🌍 Porque coidar o medio ambiente é unha tarefa de todos.
🌊 Porque cada xesto conta.
🧹 Porque a praia que queremos depende do que fagamos hoxe.

Preme no vídeo para ver como foi a nosa xornada de limpeza e deixa que os nenos e nenas che conten a súa experiencia:

PROTEXENDO O LITORAL: O ALUMNADO DE 2º DE PRIMARIA EN ACCIÓN

 

Limpeza na Praia de Boiro: Pequenos Xestos, Grandes Cambios 🌍

A contaminación mariña, especialmente a causada polos plásticos, supón unha ameaza real para os nosos ecosistemas. Isto foi algo que puideron comprobar de primeira man a rapazada de 2º de Primaria do colexio Agro do Muíño, que puxeron mans á obra para protexer e coidar este espazo natural tan especial. 🐚

En colaboración coa Concellería de Medio Ambiente do Concello de Ames, organizamos unha xornada de limpeza na praia, coa inestimable axuda de Xuxo e Sergio, dous grandes aliados na tarefa de concienciación ambiental. Nun día radiante de sol ☀️, o alumnado recolleu quilos de lixo: plásticos, zapatillas e todo tipo de residuos que nunca deberían rematar no mar 🌊.

🌍 Xuntos, demostramos que un mar sen lixo é posible!” Pequenos xestos que marcan a diferenza para coidar o noso planeta 

Foi unha xornada para lembrar, non só polo traballo en equipo e o bo ambiente, senón tamén por unha anécdota inesperada: mentres tomaban un merecido descanso cun petisco saudable, produciuse o gran apagón eléctrico que afectou a toda España ⚡, facendo aínda máis memorable o día.

Ao longo desta xornada as nenas e nenos tomaron conciencia do impacto real do lixo nas praias e na fauna mariña 🐠.  Pois a natureza regálanos lugares marabillosos, como as nosas praias, pero tamén nos lembra que precisa do noso coidado.

✨ Cada pequeno xesto conta para evitar que os residuos acaben no mar.

🎬 Preme no vídeo Un mar sen lixo e descubre como a rapazada de 2º de Primaria fixo da Praia de Boiro un lugar máis limpo e  sostible 🌊

CON ILUSIÓN E RESPONSABILIDADE: "MANS Á TERRA"

 

🌱 Mans á terra: a cativada de 5º de Infantil coida o seu xardín

O alumnado de 5º de Infantil viviu estes días unha experiencia chea de aprendizaxes, emocións e traballo en equipo. A través do coidado do seu pequeno xardín, en rodas reutilizadas, aprenderon que ser responsables coa contorna.

Así pois, a cativada de 5º de Infantil embarcouse nunha nova aventura co seu xardín escolar, que leva acompañándoos dende o curso pasado. Durante estes días, realizaron diferentes tarefas de mantemento e preparación: comezaron arrancando as malas herbas que medraran durante o inverno, que logo foron botadas ao composteiro, aprendendo así o valor de aproveitar os restos orgánicos.

Unha vez limpa a zona, prepararon a terra sachándoa con coidado, para despois plantar novas especies: hortensias, calas (tamén coñecidas como “cartuchos”), sementes de xirasois e de "tagetes". Ademais, replantaron algunhas das plantas de amorodos que sobreviviran do ano pasado, demostrando que a natureza nos dá segundas oportunidades cando a coidamos con mimo.

O máis valioso desta actividade foi o traballo en equipo. Cada neno e cada nena tivo o seu papel, aprendendo que para que as cousas saian ben, todas as mans suman. Risas, emocións, preguntas e descubrimentos acompañaron unha xornada que non remata aquí: porque as plantas precisarán seguir sendo coidadas, regadas e limpas de malas herbas nos vindeiros meses. 

Agora agardan con ilusión ver como agroman e medran, conscientes de que o seu compromiso e responsabilidade serán claves neste proceso.

Esta actividade ensinounos que, igual que as sementes precisan atención para florecer, tamén o noso planeta necesita do noso coidado diario. 

Seguiremos acompañando este marabilloso proceso, porque xuntas e xuntos facemos medrar a natureza… e tamén medramos nós como persoas, aprendendo a ser responsables, respectuosos e agradecidos coa contorna que nos rodea. 💚🌿

🎥✨ “Non perdas o vídeo desta marabillosa xornada de plantación, onde verás ás nosas pequenas e pequenos coidadores do planeta en acción, traballando con ilusión e moito corazón!”🌿😊

PEQUENOS XESTOS, GRANDES CAMBIOS

 Pequenos xestos, grandes cambios: coidando o planeta dende Infantil”

O alumnado de 4º A de Infantil estivo este curso moi implicado nunha misión moi importante: coidar o noso planeta. Ao longo destes meses, realizamos múltiples actividades co obxectivo de que a cativada tome conciencia da importancia de coidar a contorna que nos rodea.

Desde ben pequenos e pequenas, os nenos e nenas aprenden a respectar a natureza, a reducir, reutilizar e reciclar, e a entender que os pequenos xestos cotiáns poden traer grandes cambios para o futuro do planeta.

Entre as actividades realizadas destacan manualidades con materiais de refugallo, onde deron unha segunda vida a obxectos que ían para o lixo; as saídas á contorna para coñecer os elementos naturais que nos rodean e localizar os contedores de reciclaxe; e a plantación de semilleiros e de plantas en rodas recicladas, transformando obxectos de refugallo en pequenos fermosos xardíns.

Con estas propostas, traballamos valores como a responsabilidade, a solidariedade e o respecto polo medio ambiente, facendo que o alumnado sexa parte activa no coidado do planeta.

Estamos moi orgullosos e orgullosas do noso alumnado, que demostrou ser consciente e comprometido. Seguiremos traballando con ilusión para que crezan sabendo que cada acción conta!

“Cada acción conta! O alumnado de Infantil demostra que para cambiar o mundo non hai idade. 🌱✨”

Animamos tamén ás familias a continuar esta aprendizaxe na casa, facendo pequenos xestos como reciclar correctamente, reducir o consumo de plásticos e compartir momentos na natureza cos nenos e nenas. Entre todas e todos, podemos seguir construíndo un mundo máis sostible para o futuro!

Xuntas e xuntos podemos conseguir un mundo mellor! 🌸✨

CIENCIA QUE ATRAE: XOGANDO CO MAGNETISMO

 O poder do Magnetismo en Infantil

A rapazada de 4º B de Infantil tivo a sorte de contar coa colaboración de Manuel, alumno da USC, que estivo realizando o seu período de prácticas con nós.

Entre as moitas actividades que Manuel organizou neste tempo, queremos destacar unha proposta educativa moi especial e divertida: un obradoiro de experimentación co magnetismo. Os nenos e nenas puideron aprender, de forma práctica e vivencial, como funcionan os imáns e que corpos se atraen ou se repelen. Formulando hipóteses, experimentando, observando e sacando conclusións, a cativada mergullouse no marabilloso mundo da ciencia.

Durante todo o proceso, desfrutamos de momentos cheos de emoción e descubrimentos grazas aos xogos e experimentos que Manuel nos foi propoñendo. Ademais de achegármonos á ciencia, esta experiencia tamén nos axudou a reflexionar sobre a importancia de ciencia na nosa vida.

A rapazada está encantada de compartir con vós esta divertida experiencia e agarda que vos anime a experimentar tamén na casa, sempre coidando do noso planeta.